„Од сон до сонце“ е мотото под кое оваа година ќе биде одбележан најголемиот македонски празник – 2 Август, на кој се слави јубилеј 70 години од АСНОМ и 111 години од Илинденското востание.
Владиниот портпарол Александар Ѓорѓиев, согласно владината Програма за одбележување на националниот празник која беше усвоена на последната седница на Владата, на прес – конференција изјави дека предвидени се низа активности од спортски, културен, едукативен и државнички карактер.
„Она што го изградиле нашите предци е најцврст темел на којшто ја градиме нашата иднина. Сонот за којшто тие се бореле е слободата која што денес ние ја живееме. Да продолжиме да се движиме напред кон сигурна иднина затоа што секоја наша нова победа денес е нов Илинден за следните генерации. Тоа е пораката која што сака Република Македонија да ја испрати оваа година во врска со одбележувањето на 2 Август и на тој начин симболички да се поврза минатото, сегашноста и иднината како најдобар ориентир овие вредности коишто биле промовирани во минатото да се искористат во актуелната ситуација, со цел да се обезбеди подобра иднина за сите граѓани на Македонија и подобар развој на нашата земја,“ рече Ѓорѓиев.
Тој посочи дека во одбележување на програмата ќе бидат вклучени Сојузот на борците од НОБ, Македонската академија на науките и уметностите, националниот сервис МРТ, а со свои активности ќе се вклучат и сите општини во Републиката.
На централната свеченост во Скопје ќе се обрати претседателот на државата Ѓорге Иванов, на собирот во Крушево ќе се обрати претседателот на Собранието Трајко Вељаноски, а во Пелинце премиерот Никола Груевски.
И оваа година ќе биде организиран бесплатен превоз за сите граѓани кои ќе сакаат да присуствуваат на прославите по повод 2 Август во Крушево и во Пелинце. Распоредот на тргнување на автобусите ќе биде објавен во текот на неделава.
Извор: МИА